សូមណែនាំប្រិយមិត្តទាំងអស់មកកាន់វិជ្ជាចម្អិនអាហារប្លែកៗ និងគួរឱ្យចង់ញ៉ាំ! ថ្ងៃនេះយើងខ្ញុំមាន "ស្លាបមាន់ប៉ុកប៉ុក" សម្រាប់បង្ហាញជូនលោកអ្នកដើម្បីអនុវត្តទាំងអស់គ្នា!
គ្រឿងផ្សំ៖
ទឹកត្រីកន្លះពែង, ស្ករសកន្លះពែង, ខ្ទឹមស ប្រហែល ៤ ៥ មើម បុកពាក់កណ្ដាល ចិញ្ច្រាំពាក់កណ្ដាល, ស្លាបមាន់ប្រហែល ១ គីឡូក្រាម, ប្រេងឆា, ម្សៅពោត ១ ពែង, ជីវ៉ាន់ស៊ុយចិញ្ច្រាំ ១ ស្លាបព្រាបាយ និងជីអង្កាម ១ ស្លាបព្រាបាយ
វិធីចម្អិន៖
- លាយទឹកត្រី ខ្ទឹមសបុក និងស្ករសក្នុងចានគោមមួយបញ្ចូលគ្នា ហើយដាក់ស្លាបមាន់ចូល ទើបដាក់ចូលក្លាសេក្នុងទូទឹកកក ឬធុងទឹកកកឱ្យវាចូលជាតិល្អ
- ចាក់ប្រេងឆាចូលក្នុងខ្ទះក្ដៅប្រហែល ២ ស្លាបព្រា ដាក់ខ្ទឹមចិញ្ច្រាំចូល រលីងឱ្យវាឡើងពណ៌ត្នោតទុំ រួចដួសវាសម្រកប្រេងចេញឱ្យអស់
- ដាក់ខ្ទះលើចង្ក្រាន រួចចាក់ប្រេងឆាចូលច្រើនល្មមគួរសមនឹងបំពងបាន ទុកឱ្យវាក្ដៅ
- យកស្លាបមាន់ដែលដាក់ឱ្យចូលជាតិនៅលើក្រដាសបឺតខ្លាញ់ និងសំណើម រួចរោយម្សៅពោតពីលើ ហើយដាក់ស្លាបមាន់បំពងក្នុងខ្ទះដែលមានប្រេងឆាកំពុងពុះ ដោយបំពងវាឱ្យឆ្អិនល្អទាល់តែអាចញ៉ាំកើត
- ពេលស្លាបមាន់ឆ្អិនហើយ សូមដួសវាដាក់សម្រកខ្លាញ់ ហើយដាក់ក្នុងចាន រួចរោយខ្ទឹមលីង ជីអង្កាម និងជីវ៉ាន់ស៊ុយពីលើជាការស្រេច
No comments:
Post a Comment